Kātahi te iwi whakapeto ngoi, ko Tainui.

Ko te mahi a te tangata i kitea ai i ngā whakataetae kapa haka a rohe i tū ki te Papanui ki Claudelands Arena.

Tekau mā toru ngā roopu haka i harurū ai i te papa-tū-waewae, e haka i te haka o te Tane Rore, e tū i tū o Hine Rehia.

Ko Ngāti Wairere te reo karanga ki a kuhu ā iti, ā rahi ki tōna tini māioio.

Ara atu ano ngā wiki i whakapauhia e ngā roopu haka ki a rite mai mo ngeenei whakataetae, ā, mā ngā kaiwhakawā e whakatau  ko wai ka hua,  ko wai ka toa.

E whā ngā roopu haka ka tū hei māngai  mo Tainui waka ki ngā whakataetae Kapa haka ā motu e kii ā ai ko Te Matatini, ka tū ki Otautahi i te tau 2015.

E ai ki a Pumi Tumai no Te Reo Irirangi o Tainui, i reira e pāpāho ana i ngā nekehanga.  I mīharo nga whakaritenga, te hirahira hoki o te papa-tū-waewae.

Ki tāna i kite ai, ko Horopounamu tētahi o ngā roopu haka i tau ki roto i ā ia, i te mea i te kakari te tū.  ‘Ahakoa ngā nikoniko, e kitea ai ngā wairua o ngā tūpuna i hinga ki te pakanga nui o Rangiriri. I heke ai ā toto, i taka ai te rau ō patu, i hōpuapua te karenga o te awa o Waikato’.

I ea te tautoko nui mai ā te iwi. I eke panuku ngā tumānako, i eke tangaroa te manemanerau o te rangi.

Mo te taha ki te wairua whakataetae i mea mai a Pumi, ‘kātahi te iwi whakapeto ngoi, Ko Tainui’. ‘Minamina katoa ana ahau i te mea he tuāpapa kua hangāia mo te tāhūhū o te whare haka o Tainui. Hei whai mā te hunga matākaikutu hei te tau tītoki’.

Ko Mōtai-Tangata-Rau te roopu i eke ki te panekiretanga o te rā. I tuarua mai ko Te Iti Kahurangi, ka toru, ko Te Pou- O- Mangataawhiri, a, i tuawhā ko Nga Pou-o- Roto.

Nā, ko ēnei ngā roopu Kapa Haka i whakatau e ngā kaiwhakawā, ka tū ki te mura o te ahi, hei māngai mo Tainui waka ki ngā whakataetae o Te Matatini 2015.

Me mihi ki a Ngāti Wairere me ngā roopu haka o te waka o Tainui. Tekau mā toru ngā tira i tū, mei kore noa ko koutou e uru ai ngā kapa e whā ki ngā Whakataetae o te Matatini 2015.

Me whakahīhī tonu rā ka tika.